究竟點解想做一個飛機師?

好多人問過我呢條問題，老實講我一開始真係唔曉答。英雄主義？搭馬？咁當然緊係因爲型啦係咪先？對大部分嘅香港人黎講，飛機師似乎遙不可及，係基本上啲神人讀書好聰明嘅人先做到。咁事實上係咪真？ 的確要係香港做到一個民航機師真係好困難，航空公司每年收到4000-5000份申請表，但每年只請大概200位學員。但你問我是否每一個學員都係高材生？都係一口流利英文？當然唔係，我諗大部分嘅師兄師姐都會認同。但我可以好肯定咁話你知，對每一位現職嘅飛機師甚至每一位航空公司嘅cadet黎講，我地真係好撚鍾意飛！而呢一篇就係我愛上飛行嘅一段小故事~

"mmmm...天氣不似如期 但要走 總要飛"

媽媽：你睇下啲機師幾鬼型

我：呀媽如果我做機師好唔好呀？

媽媽：你？你鬼做到咩 要讀好多書架！

當時得8嵗嘅我，就係咁樣比呀媽一野打沉左。唔怪得佢嘅，當時細個睇妙手仁心就話想做醫生，睇律政新人王就話想做律師，睇洗冤錄就話想做法醫。咁睇得衝上雲霄當然緊係第一時間話想做飛機師架啦！！當初身邊每個人尤其係女仔都話好鍾意Sam哥，無可否認Sam哥真係好型，不過過往同我係IG傾過計嘅朋友都可能聽我講過，我最鍾意嘅係吳卓羲嘅角色。唔知點解我覺得吳卓羲佢地一班cadet由零去到學渣飛機，去到畢業入747機隊，呢一切我覺得好熱血。加上我覺得我好似吳卓羲個角色唐亦風咁，成績唔算好好，又反叛，又成日同屋企人頂嘴，全部都更加令到我對唐亦風有一種莫名其妙嘅感覺。可能加上見到佢地渣飛機自己都覺得好型嘅關係，呢套戯就反而深深記錄左係我個腦入面。

Fast forward到2009年我14嵗個陣，我有幸去左個朋友屋企玩左佢部flight simulator。當時我乜都唔識但係就覺得非常過癮，之後就返屋企睇下YouTube片，然後睇下啲飛機雜志，再google下認下啲飛機咩樣。就係咁樣隨住我對飛機嘅興趣慢慢增加，當年衝上雲霄呢套戯嘅畫面又係我個腦到出現啦！唔洗問我就即刻走去重睇呢套經典嘅劇集。睇完之後就走去公司嘅網站望下考cadet嘅基本要求係咩。望一望，哇！中學畢業讀過數理就報得！好似好簡單咁LMAO。當然事實上唔係真係咁簡單，玩多兩玩我就頂唔順決定自己去買Flight Simulator X玩。

由2010-2013我中學畢業我就一直鋪路，幫自己增長下對飛機嘅知識，有時讀下書，睇下YouTube片，同埋玩flight sim。當時我玩sim真係好癲架！Join左個模擬航空公司之後就跟住佢啲schedule flight，real time咁飛去澳洲或者歐洲或者美國。部sim cruise緊嘅時候我就係隔離打機，睇戯，食野 LMAO。一開頭我咩都唔識架，都係上網睇人點整flight plan，點樣入FMC，點樣做ILS landing，等等。當然程序上唔係跟足曬真機嘅procedure，但簡簡單單嘅程序都令我學到唔小野。慢慢我對飛機嘅興趣就培養成爲熱誠！我有一日我真係忍唔住我坐係部電腦面前講左句，他朝一日我要坐係架真飛機入面做一個真正嘅機師！！！

到我中學畢業揀大學讀咩，我本身第一志願就係一閒澳洲大學嘅Bachelor of Aviation Flying，學費非常昂貴，讀完有CPL/ATPL但一定唔包考到cadet，考唔到亦都唔包係澳洲揾到飛行工作做。加上我覺得如果第日因爲身體咩事或者whatever啦唔能夠繼續做到機師，我就無任何backup無其他專長。所以當時做左我覺得一個非常明智嘅決定，就係改左我個第一志願然後就讀左該大學嘅Bachelor of Aerospace Engineering。遲啲有機會再詳細介紹返呢個degree係讀咩。我中學畢業之後做嘅第二個明智選擇，就係無禁到制報cadet！我account都開埋，但就係無報到。我好慶幸我當時無衝動禁制，因爲我一定fail硬！當時我仲未知道其實考嘅過程係點，甚至乎細機嘅知識都係略懂一二，報左我好肯定1A一定fail，所以好慶幸我無曬左自己一次機會而選擇左讀完個大學先考！！

點解想做一個飛機師？好多人都唔識答呢條問題，鍾意咪鍾意囉有得解架咩？其實真係好難解，但你要明白呢個世界係唔會有一定嘅一見鍾情架。當你接觸到一樣好得意嘅野時候，你會對佢產生好奇心。慢慢你了解多啲呢樣野嘅時候你就將佢變左做興趣。而當興趣都唔足夠所以你花大量時間去學多啲，睇多啲關於呢一方面嘅野嘅時候，當你發覺點解你IG，YouTube，Facebook或者朋友圈子都係圍繞住呢樣嘅時候，或者你無時無刻都諗住嘅時候，你就知道你已經愛上左佢。而呢個先係真正對飛行有熱誠嘅表現！所以下次有人問你呢條問題，答之前你要先問返自己，你究竟對飛行付出左幾多？

今次係我第一次寫blog，好多謝HKCockpit同ATVpilot嘅邀請！希望以後可以多啲同大家分享我嘅故事同經歷！！下次會講下我係外國讀書加學飛嘅經歷， stay tuned :)