揸飛機好容易？你嘅第一次又係點㗎呢？

相信想做機師嘅你，一定會想親身去試下揸飛機嘅感覺係點。而相信大家第一次嘅飛行經驗都係畢生難忘。咁究竟去邊到飛好呢？飛咩機種呢？飛幾多個鐘？邊間學校好呀屌？呢啲問題相信大家學飛嘅時候都有問過自己，而呢啲嘅考慮其實非常重要。面試嘅時候俾人問唔在講，呢啲嘅考慮可以幫到證明你係咪一個深思熟慮，諗野成熟嘅一個人。通常去學飛都係自己一個，住又係自己一個，花嘅時間同金錢當然都唔會特別小，所以考慮得清清楚楚先做決定都係俾自己嘅一種交代。我聽過好多人join啲懶人包，俾一個價錢就咩都包曬嘅飛行課程，我問返呢啲人其實好多時候佢地都無認真做過咩資料收集，講到底都係貪方便乜都唔洗自己搞。所以提提大家，揀一間適合自己嘅飛行學校係好重要。無論你係段鐘飛又好或者參加飛行課程又好都無問題，只要你有一個好清晰嘅mindset知道自己點解做呢啲決定，呢樣先係最重要。上回講到我點解想做一個機師，今次就分享下我係澳洲第一次學飛嘅經歷啦！！

Sam哥：喂你知唔知可以俾錢就有trial flight架啦？zha

我：下！可以架咩？唔洗學過sim先架咩？

Sam哥：屌唔洗架，我個陣俾幾舊水就有得飛

我：但係sim都未飛過喎，點揸真飛機？

Sam哥：我叻囉。。。

我個朋友真係叫呀Sam，而佢亦都無講大話。真係可以俾兩舊水澳紙就有得揸飛機架原來！！年少無知嘅我剛剛開sem，當時都仲未搞清楚揸小型飛機究竟係咩嘅一回事，畢竟我中學玩Flight Sim係玩747比較多所以無乜點研究小型飛機。聼完Sam哥咁講當然第一時間上網查下有咩飛行學校可以比我初嘗揸飛機嘅滋味！當時我分析完唔同飛行學校嘅資料後就好快揀好左一間。因爲價錢還可以，當時一個鐘嘅Trial Introductory Flight (TIF) 係240AUD，加上網上好多好評。之後我就好快打電話去book時間去飛！間學校offer兩種唔同機種做訓練 (Piper Warrior and Cessna 152)，當時我都唔知道有咩分別就上網查，然後見到Piper係一架low wing，感覺比較似一架民航機所以就選擇左學飛Piper，純碎就係一個咁低能嘅原因😄

如果大家有興趣想去澳洲學飛嘅可以PM我，可以比啲意見你地！

好期待好期待！終於到左飛TIF嘅日子啦！去到Flight School見到啲教練著曬制服，有一柴二柴三柴，當時我第一感覺就覺得好神奇，亦都係第一次體驗到唔係民航嘅飛行工作。話咁快一個身高六尺四嘅教練就走黎同我講今日就由佢帶我去飛！老實講我真係嚇親😄 講解完我地今日會做咩之後好快就出去架機個到做pre flight check。當時我就一直望住佢做，check ailerons，flaps，propeller，engine，fuel 令我第一次親身感覺到做飛機師係幾咁專業！上機，噠引擎，聽到propeller係到轉嘅聲音真係好急不及待。話咁快就準備takeoff，個教練見我係咁問問題又眼睛發亮咁LOL 就話可以比我試下takeoff！！當然佢會有一隻手保持係yoke到guide我。佢叫我將throttle推到最前，然後60 knots之後就慢慢拉起機頭~~

我：60 knots, V1, rotate, gear up~

我唔係講笑我真係好白癡咁講左出黎😄 個instructor係隔離聽完都大笑左聲！起飛之後個感覺我係最大感觸，因爲真係人生第一次真係控制緊架飛機。搭民航機得個咁細嘅窗口同埋好快就爬升得好高都睇唔到咩景嘅，反而小型飛機飛得好低，2000-4000尺我當時望到出面真係覺得靚到不得了！之後我地就飛左去一個叫Palm Beach嘅上空到轉下彎睇下風景咁。有去過悉尼嘅朋友仔都知道Palm Beach啲風景真係好靚！不過我就反而無乜點留意啲風景，因爲係呢個時候個instructor就放手比我轉下彎親手飛下咁。當時我就係咁望啲儀表，想維持Straight&Level但就發覺成日都會overshoot或者undershoot咁。之後個instructor先同我講話原來渣小型飛機VFR係無需要望住儀表飛，9成時間都係望出去，可能我太過習慣玩Flight Sim啦當時。開心嘅時間過得特別快，係時候返去land啦。

返到屋企我都已經不能夠形容我當日嘅心情，第一次嘅感覺真係好神奇。我相信大家同我一樣，都會好記得第一次飛嘅感覺係呢世都唔會忘記。諗返起我第一次飛已經係六年前啦......

如果我仲有四年嘅大學生涯係澳洲嘅話，我唔飛多啲就真係對自己唔住，所以我就決定去考牌。當時RPL Part 61都仲未推出，機師第一個飛行試係叫GFPT然後就PPL。但GFPT并不是一個牌照類似係一個progress test咁。但幸好RPL嘅來臨剛剛好replace左GFPT，我當時飛完second solo之後得悉呢個消息就決定先考左RPL先，考唔考PPL就再決定。

無論係揸民航又好，小型飛機都好都係一份專業。個牌比得你你就預左你要咩起呢份責任。就算我係得個RPL都好，我係有權簽走maintenance logbook，log reported failures之類。所以如果我唔專業嘅話，我簽左本maintenance log，如果架飛機有咩事我係需要負全責，分分鐘觸犯航空法例，因爲係我簽走架機。同時每飛一轉嘅preflight check，fuel planning都要做到足，保持飛行安全確保我自己同我啲朋友嘅命仔。揸民航就有一套好strict嘅protocol或者SOP要跟，但小型飛機反而就無，所以要做嘅抉擇唔會比起民航機師小！如果唔係點解全世界嘅機師都要由小型飛機開始學呢？公司大可以全部整曬啲MPL program出黎，教人入sim打機打夠200-300個鐘咪可以揸民航囉係咪先？仲要平啲添！但你見全世界無乜公司會咁做，就算以前港龍有MPL program而家都已經無，因爲根本唔係揸緊飛機，你係學緊打游戲機！所以除左對飛行有熱誠之外，我地都要尊重我地呢份專業，紀律同臨危不亂係一個機師應有嘅條件！

好多謝你地睇我啲咁長嘅文LMAO，之前個blog有500+人睇我都有啲受寵若驚！如果你地想聼啲咩故事，學飛經歷，外國讀書嘅野都可以IG pm我或者係到留言我下次可以寫。大家比下意見啦！最後最後你地可以係到留言，或者IG pm我，話比我知你地第一次嘅飛行經歷係點好嗎！！！如果鍾意睇我啲blog嘅，記得share出去比其他想考cadet嘅朋友仔睇啦！